azzajabr

Monday, May 29, 2006

مقتطفات من حياة موظف سلطة

البداية...........
عام 1996 فرح ونط فبعد ما اخد الشهادة بحوالي 12 سنة اخيرا حيتوظف، لالالا مش بسبب البطالة ابدا بطالة ايه يا بني ده كان بسبب الاحتلال مهو الي كان يشتغل ضد اسرائيل وينتمي لاي حزب نضالي كان بيتحرم التوظيف هو ما كنش بيطمع يكون مدير عام والا حتى مدير هو كان بيحلم يدرس الاولاد وبس (رغم تحفظه على المنهاج ) بس اهي وظيفه تامن مدخول شهري ياااااااااااااااااااااااه واخيرا راح يتوظف يمكن الشارع كله سمع صوت فرحه
الف الف مبروك


يا وظيفه يا وظيفه الكل حسدك يا وظيفه
قوم يا بني قوم
يا حبيبي يا امي خليني انام كمان شوي
قوم يا حبيبي شوف شو صار مع ابن ابو محمد
شو صار يعني؟؟ اخدوه الجيش؟؟؟
جيش ؟؟؟ جيش ايش الله يهديك فال الله ولا فالك
والا شو صار؟؟؟؟؟؟؟؟؟؟؟؟؟
اتووووووووووووظف
توظف؟؟؟ كيف؟؟؟ ومين وظفه؟؟؟
يا حبيبي يا ابني انت ناسي انه كان مناضل ويستاهل انهم يكافؤه بشقفه وظيفه على الاقل
معاكي حق، وانا الغبي الي ما عرفتش اكمل تعليمي كان انا هله موظف واحسن منه وبعدين شو يعني انحبسله اكم سنه والا راحت ايده في انفجار قنبله ؟؟؟ ما علينا المهم فاتحين مباركة والا شو؟
اه فاتحين يالله قوم باركله


الوظيفه هي الامان
عارف يا صاحبي
شو؟؟
انا مش محظوظ ابدا
له له ليش ما انت ماشاء الله مش ناقصك اشي
ناقصني كيف عاد مش ناقصني مش شايف الكل قاعد بيتوظف والي مدير والي رئيس قسم والي والي وانا الي معاي ماجستير قاعد بشتغل بالدهان
يا ابني وماله الدهان مش بيجيبلك دخل كويس وماشاء الله
اه بس الشغل زي ما انت عارف مواسم بس لو انا موظف كان بنام وانا مرتاح اخر الشهر جايين هالمصاري
احكي الحمد لله
ايييييييييييييييييييييييه الحمد لله


اضراب اضراب
يا جماعة عارفين انه بكره اضراب؟؟
عنجد بتحكي بدك احلى حلوان على هالبشارة
بس ما حكيتلنا ليش الاضراب
يا عمي بدنا يزيدولنا هالاكم ملطوش الي بيعطونا اياهم
ما انت كنت قاتل حالك على هالاكم ملطوش هسه صاروا مش نافعين؟؟
كنت اهبل يا سيدي وعقلت شو بدك؟؟
طيب كيف راح يكون الاضراب جزئي والا كلي (بسره يارب كلي يارب كلي)
اولها راح نضرب عن اخر تلات حصص واذا ما استجابوا راح نضرب اضراب كلي
يا جماعة مش شايفين انه احنا عنا طلاب توجيهي وحرام نضرب هيك وما نعطيهم حقهم
يا عمي بلا طلاب بلا بطيخ الله لا يردهم المهم يزيدونا
كيف الله لا يردهم بكره ابنك بصير مكانهم شو راح تعمل لو استاذه اضرب
ليش هو وقتها راح يضل الراتب مثل ما هو والله عشنا وسمعنا
عارف اي هالكم ملطوش الي بحمولنا فيهم جميله في الشهر انا كنت اطلع قدهم في اسرائيل باليوم
اه والله اشي بقهر انا لما كنت اشتغل بياع جرايد وبيض كنت عايش ملك
اقولكم اي طزززززززززز عليها من سلطة الله يقطعها ويقطع اليوم الي شفناها فيه

على فكرة كل الاشخاص الي في المشهد دبحوا حالهم على الوظيفه ولما راح يقدمولها من شان الله وظيفه بالف شيكل مش فارقة معانا المهم الوظيفه وبعد ما اخذوها شافوا حالهم عليها عنجد عنجد عشنا وشفنا


عام 2006
الحمد لله يا جماعة هي اجتنا حكومة بتعرف الله وراح تنصفنا كلنا
ولكو يا جماعة سمعت انهم راح يخلوا راتب الاستاذ بدل الالفين زفت الي بناخذهم عشرة
من ثمك لباب السما الله يوفقكم يا رب
عارفين اي انا سمعت انهم ما راح يخلوا حد من غير وظيفه حتى ابن الاربع سنين راح يتوظف
من ثمك لباب السما الله ينصرهم
لا والا بقولولكم انهم راح يقضوا على البطالة والفقر يعني فلسطين الي كانت افقر بلد في العالم لتصير تشحد امريكا منها وبكره بتشوفوا
من ثمك لباب السما الله ينجحهم
عارفين كمان راح يعطوا كل موظف سيارة ودار ومرة واولاد كمان
من ثمك لباب السما الله يعطيهم
يه يه والا بقولولكم لا راح يصير في مسؤول والا مش مسؤول كلنا راح نصير مثل بعض ما في حد احسن من حد
من ثمك لباب السما الله يقويهم


بعد شهر ...............
يا جماعة شو طمنونا نزل الراتب
يا عمي بقولوا لسه ما في مصاري يالله معلش بنستنالنا كمان اكم يوم الله يفرجها
والله يا ابو فايك بقولولك القبضة ما راح تنزل من هان لسبع شهور
له له يا عمي قول وغير شو سبع شهور هاي اي بنموت جوع
ما في حد بموت من الجوع يا جماعة صلوا على النبي
اللهم صلي عليك يا نبي


بعد شهرين...........
وينك يا رجل الك يومين مش جاي على الشغل المدير قالب عليك الدنيا
يا عمي اي هو انا معي اجرة الطريق لحتى اجي اليوم الصبح اتداينت من جاري علشان اقدر اجي
يا سيدي اعطينا تلفون قول انك مش جاي
التلفون ما دفعت فاتورته قطعوه
يالله بعين الله يا سيدي الجوع ولا الركوع
انو جوع يا عمي اي عمى يلطش هلوضع
طيب ما تجوع يابا كل زيت وزعتر
اي انت عارف كديش كيلو الزعتر هالايام؟؟؟ وهي تنكة الزيت رخيصه ليكون


بعد ثلاث اشهر والرابع على الطريق
يا جماعة سمعتوا اخر الاخبار
ها خير شو في
بقولولكم الي بده راتبه يروح على الجامعة العربية
يا عمي روح قاعد بتتخوث اي هو اعصابنا مستحمله
يا جماعة عارفين صاحب الدار صار كل ما يشوفني يكشر
صدقني ناس ما عندها دم اي هو في ايدنا مهو عارف انك موظف سلطة
عارف مبارح مريت على الدكان اشتري اغراض للدار عالدين طبعا صاحب الدكان غمي وصاروا يفيقوا فيه لما صحي فرجاهم دفتر الدين صاير على الناس الاف مألفة والرجل مش عارف يدبر حاله ويجيب بضاعة
عارفين بقولوا بياعين الذهب بطلوا يشتروا ذهب على قد ما الناس باعت ذهب هالايام، مرتي مبارح باعت ذبلتها وما ظل حيلتنا اشي
هي وقفت على الذبلة يا زلمه انا صار بدي ابيع ولادي لولا العيب
طيب وليش ساكتين يا عمي وعلى شو صابرين
ما بدنا ننفضح بين هالعالم والناس ويقولوا علينا فاشلين
يا عمي فاشلين فاشلين اي هو حد سائل بالموظف المشحر كله بركض وراه هالكراسي يلعن ابو الكراسي يا شيخ
سمعتوا قال شو بقولوا قال يا اخوانا كل الموظفين طلعوا محسوبين على فتح وفتح قبظتهم اي انا عمري ما كنت مع حد غير ما ام اسعد
طيب يا عمي الهم شهر قاعدين بشحدوا من هالناس شوي على المنارة والي باع ذهبه وتبرع للحكومة والي حط حصاله ابنه وتبرع للحكومة شو بدكم اكثر اي خلي عندكم دم شو بدها تعمل الحكومة يعني تشنق حالها
لا ما تشنق حالها يا حبيبي بس تقتلنا من الجوع
مهيك ماشا الله عليك زي القرد ما فيك البلا
اي خليها على الله الله بيعلم كيف الواحد مدبر حاله، انت عارف اني بطلع من الساعة 7 من الدار وبمشي ساعة علشان اوصل على الشغل لا وشو بقولونا الي ما بداوم بتعاقب يعني بعطونا راتب وبدهم ايانا نشتغل صدق الي قال كتب علينا العمل ببلاش

وما زال السيناريو مستمراً

4 Comments:

  • At June 7, 2006 at 11:51 PM, Blogger Asad Ramallah said…

    عزيزي
    البلوغ تبعك جميل جدا جدا
    وتمتعت بقراءته
    فتحت بلوغ جديد عنوانه
    http://almanarasquare.blogspot.com
    فية مواد عن الفن والسينما والكاركاتير
    اشكرك لو تفضلت بالاطلاع عليه والتعقيب
    أسد النمر - رام الله - فلسطين

     
  • At June 17, 2007 at 7:50 AM, Blogger خليك فى البيت said…

    ندعوكم لزيارة مدونة خليك فى البيت والمشاركة فى الحملة

     
  • At June 24, 2007 at 1:15 AM, Blogger mira said…

    كيفك عزة شو اخبارك ياه شو الدنيا صغيرة اذا كنتي معنيه بمكالمتي اكتبيلي على
    merkmg@hotmail.com
    ميرفت

     
  • At May 12, 2015 at 5:47 AM, Blogger E- Dawam said…

    إي- دوام بوابة التوظيف المتخصصة في توظيف ذوي الاحتياجات الخاصة وأسرهم، صممت البوابة خصيصاً لتوفر افضل العناصر والكوادر البشرية للمؤسسات والشركات داخل المملكة العربية السعودية
    www.edawam.com

     

Post a Comment

<< Home